Görkauer Mundart

Hinweis: falls jemand von den Heimatleuten irgend einen Hinweis dazu geben kann, oder Fehler entdeckt, so möge er sich bitte bei der Redaktion von www.goerkau.de melden!  J. Schmidt, GFK, im März 2018

Eine Mundart-Geschichte aus Görkau

Der heilige Petrus in der Görkauer Kirche

Eine Betrachtung in alter Görkauer Mundart von Werner Proksch

Wie iech nuch e klaaner Gung wor und mier nuch  in Jerke gewohnt homm, sei meine Eltern un iech jeden Sunntooch in de Jerker Kerch gonge.

Iech wor domols neigierich unn hob miech fier olles interessiert. De Mess hot ju ane Zeit long gedauert un dor Pforrer hot meistens tschechisch oder lateinisch geredt un des hob iech ju suwiesu net vorstondn. Do hob iech holt in dere Zeit mier olles genau ohgeguckt in dere Kerch, während dor Pforrer of dor Kanzel gepredicht oder vorne om Oltor de Mess gelesen hot.

 In dere Jerker Kerch wor fei viel zu guckn. De Deck wor bemolt mit ollerhond scheene Bilder. On de Wänd worn aah Bilder aufgehängt un viele Figurn worn aah rimgstondn oder on der Wond festgemocht. Un vorne wor dor Hauptoltor un zwaa Seitenoltäre mit Figurn un Bilder un Engeln, un olles wor su schee vorziert.

 Of dor rechtn Seit des wor fei herich dor Rothenheiser Oltor und der wor aah gonz bsonders schee verziert un ausgemolt, weil des worscheinlich de Fürstn vom Schloß Rothenhaus domols bezohlt hottn. Ower om meisten iewerlecht hob iech iewer den Mooh, der dort on dor Wond festgemocht wor, wu’s in den Rothenheiser Oltor nei gieht of dor linken Seit.

 Mier homm in Jerke in dor Brixer Strooß gewohnt un de Heiser hottn domols kaane Zentralhaazing. In Winter mußt mor mit Hulz un Kuhln Feier in Uufn mochen, wenn mor ane worme Stub oder Kich homm wullt. Un weil des Haazen mit Kuhln  su viel Ruß un Dreck gemocht hot, mußt des Uufnrohr immer moll sauwer gemocht wern, daß dor Kamin wieder gut gezuhng hot. Des hot immer mei Votter gemocht, des Rohr aus dor Wond gezuhng, vorne un hinten ane Popiertiet nohgebunden, daß kaa Ruß rausfällt und do isser dormit nunner in Huf gonge un hot des Rohr ausgeputzt. Des Uufnrohr wor mit su aner Silwerbrongs ohgstrichen, daß es e bissl schee ausgsehng hot.

Jetze zorick zu den Mooh in dor Kerch. Der wor do gstondn un hot genau su e Rohr geholtn. Des hot bold genau su ausgsehng wie unser Uufnrohr dorhamm in dor Brixer Strooß.

 Viel später erscht, wu mor emoll aus Deitschlond noch Jerke gfohrn sei, is mier klor worn, daß des fei dor heiliche Petrus is un des wos er do hält, kaa Uufnrohr is, sondorn sei Kreiz. Denn dor heiliche Petrus is ju in Rom gekreizicht wurn, mitn Kupp noch unten. Un su is des Kreiz aah, mit den Querhulz unten onstott uhm, wie mors von en Kreiz gewehnt is. Un weil in dere Kerch olles su mit Guld oder Silwer vorziert wor, hot mor holt den Petrus sei Kreiz aah guldforbich ohgemolt. Un weils rundes Hulz wor, deswehng hots bold genau su ausgseehng wie dorhamm unser Uufnrohr….

Werner Proksch (Redaktion Jürgen Schmidt,GFK)